Kena 28.10.1864, Raja Berani Pengelima Libau ti beensumbar Rentap Menua
tin nan lalu ngaga kuta ba Genting Ketupung, alah diserang soldadu Rajah James
Brooke. Udah sida ti alah dia bala Iban
lalu pepar pendiau, sida ti rari nya bisi nepatka ulu sungai, lalu Raja Berani
Pengelima Rentap rari ke Ulu Julau, lalu diau dia nyentukka iya mati tuai, lalu
dikuburka ba tuchung Bukit Sibau.
Lumbung Raja Berani Pengelima Rentap tu mengkang agi ba tuchung Bukit
Sibau lalu lumbung iya udah digaga Perintah Sarawak manah, diatu suah endur
bala temuai nemuai. Udah alah Raja
Berani Pengelima Rentap, dia tuai-tuai Iban enggau Perintah Rajah James Brooke
suah bebaik ngena atur bebunuh babi, baka ti bisi diatur ba Kubu Alice di
Simanggang, ba Kubu Lubok Antu enggau ba Kubu Kapit.
Udah pukas kayau-anak lalu pia mega pengachau menua laban Iban ti
ngayau ngelaban Perintah Rajah James Brooke, dia bala Iban belabuh munka pengawa
dagang, lalu bisi mega tuai-tuai Iban matak nembiak sida pindah ngagai menua
baru nyengkaum ngagai menua Batang Rajang, Bintulu,ke Batang Beram enggau ke
menua Limbang. Sekeda tuai Iban ti tajam
agi ati lalu mai bala nembiak sida pegi ngagai menua Malaya, Kalimantan Barat,
ngagai Pulau Jawa enggau ngagai menua bukai mega. Sida ti pegi nya endang ngiga duit. Lebuh sida mulaika diri ke menua sida meli
perengka temaga nyengkaum englerumung-gong, bedil, tajau, perengka pirak ianya ngepan indu. Tang utai ti benama ba bansa Iban ti dibai
pulai pegi nya tajau. Nyadi tajau ti
berega sereta benama nya nyengkaum, tajau rusa, tajau menaga, tajau ningka,
tajau sigieu. Nya alai enti anak Iban ti
pulai pegi bisi mai tajau, apin lama iya udah pulai dia iya lalu nirika Gawai
Tajau. Pia mega enti rumahpanjai ti
endur iya mulaika diri nya agi ngulit,
dia datai ba tenggah lama iya lalu mangkaka ‘selaing’ reti nya manjung beberapa
kali lalu orang di rumah nimbal panjung iya ngena terantang nyawa ketawak, reti
nya ulit rumah nya udah diketas, ulit udah bungkas. Kebuah nya bakanya, reti orang ti pulai pegi
nya ti bisi pulai mai tajau sebaka reti enggau orang ti pulai ngayau tulihka
pala ti lalu mangkaka ‘ selaing’ enti rumahpanjai nya ngulit. Adat tu diajar Puntang Raga ngagai tuai Iban
ti benama Serapuh.
JERITA SERAPOH.
Nyadi sekali dia bala Iban ba sebuah rumahpanjai ti betuaika Serapoh
balat bendar ditinggang penusah pemati.
Ba sida serumah ti bejarit mati nya, bisi mati pagi lalu bisi ga mati
lemai. Ketegal ditinggang penusah ti
bejarit ditinggang pemati dia sida Serapoh serumah runggu bendar. Nyadi hari siti lebuh ti ngulit nya, dia
Serapoh bisi ninga nyawa orang ngangau, “Nama kebuah kita tak runggu deh
Serapoh ?” ku tanya orang nya.
Serapoh
madahka sida nya balat endar tussah laban kelalu bejarit mati.
Orang ti nganggau nya madahka nama iya nya Puntang Raga. Puntang Raga ngajar Serapoh ngajar jalai
ngintu pemati, lalu sebengkah ati atur ti dikena ngintu pemati nya, ianya ulit
orang ti mati nya enda tau enda diketas ngena pala munsuh. Ba serak tubuh Serapoh menua endang udah
bebaik, pengawa ngayau-mulau endang nadai agi.
Serapoh tusah bendar ati laban enda nemu tungga ngiga pala munsuh dikena
ngetas ulit sida serumah ti udah mati.
Nyau kepuas iya ti berunding, dia Serapoh lalu ngema tajau menaga sigi
dikena iya nyanda bunuh. Tang orang
nadai deka benunuh ngelaban Serapoh.
Nyau kepuas iya ti bejalai dia Serapoh betemu enggau bansa Kantu siku
mansang kumai ngema anak iya. Serapoh
madah ngagai orang nya, iya deka ngiru anak mit nya lalu disilih ngena tajau
menaga ti di ma iya. Bansa Kantu nya
setuju ngasuh anak iya diiru Serapoh,
lalu tajau menaga dibai Kantu ka ganti anak iya ti diiru Serapoh.
Serapoh lalu mulaika diri mai anak Kantu nya. Kira didinga kukuk manuh ari rumahpanjai
sida, dia Serapoh lalu enggau panjung-panjung mumpung pala anak Kantu nya. Ninga panjung Serapoh, gaga sida serumah,
laban ngumbai Serapoh pulai ngayau bulih pala.
Datai di kaki tangga, Serapoh manjung baru mangkaka ‘selaing’, orang di
rumah lalu nerantangka ketawak dikena nimbal [panjung Serapoh, ulih sida
Serapoh serumah lalu bungkas, lalu rumahpanjai sida nadai agi silam nadai agi
malam, nadai penti pemali agi.
Bepun ari jerita tuai Iban ti benama Serapoh tu, dia enti orang mati
pangka peti’, mati kena pantap tauka mati kena timbak laban ti saru, pati’
nyawa orang ti bebadi nya dibayar ngena tajau menaga sigi. Atur tu lalu nyadi Adat Iban nyentukka diatu
lalu bisi dipasukka dalam Adat Iban 1993 ti pejalaika Majlis Adat Istiadat
Sarawak.
JERITA KURONG ALAS.
Nyadi bisi dulu kalia anak Iban siku ti benama Kurong Alas ti begulai
enggau indai iya. Nyadi hari siti dia
Kurong Alas madah ngagai iya, iya deka nurun belelang tang enda nemu bagi menua
ti deka dituju, iya mega madahka diri nyangka nadai mulaika diri ngagai indai
iya agi, tang enti sema iya pulai enda mega temu maya. Ninga
Kurong Alas deka belelang dia indai Kurong Alas, ngasuh Kurong Alas maia
Tajau Alas sigi nyadika pemai iya. Nya alai lebuh Kurong Alas nurun belelang iya
ngema Tajau Alas sigi, lalu lebuh iya nengah sungai, Kurong Alas belatuh ngena
Tajau Alas nya. Bepun ari tu, dia adat
Iban betumbuh, ianya anak lelaki enti bebini nguai ngagai bilik bini iya enda
tau enda bepemaika tajau sigi, pia mega Tajau Alas lalu dikemendarka dikena
mayar ukum enti orang nya ditunggu ketegal bisi salah kaki salah jari, adat
Tajau Alas mega dikena atur adat Iban dalam pengeawa lantang enggau lebuh
ngatur adat maya penusah nyengkaum ‘adat pemati’. Adat tu mega bisi dipasukka
dalam Adat Iban 1993.
No comments:
Post a Comment